خيالك خيالي
أمين زكَنون
شالي يا شوفاتي شالي
رسمي ف السما
شطحي عل الما
زاحمي گد آخرك الضلمة
ويلا دعاتك الوقت
وتشكى من عراك الصوت
سبيها ف داك القنت
الي ما بغا يظللم ف بالي خيالك …
داك خيالي ..
خيالي
هو كل مابين عمايا وسكاتي
يحل الناي عينيه
يگول ليه بلاتي
وملي الضو
يعري الضو ويتجهد
يفرتك اللوان
والگمرة لشياطة الشمس
تودود
وسيگان الليل ترخي اطوالها
وتتجبد
حروفو تتشابك بحروفك
وتتعگد
وزطاط الرزانة
يسلم گافلة الشوق لهبالي
گولي هو الي گالي
خيالك
داك خيالي…
خيالي
ك يگول لي بزاف
ماتحيرش
وايلا لقاتني
نجمة سايحة من عين الضلام
وتشاركنا التوضيرة فيه
كيوصيني
مانغيرش
ندوووق السما
من البحر
نغرررق الحشمة
ف نزوقية الشفر
وواخا نكون جغمة
ف صحرا السطر
نسكت
نسكت
نسكت
بالعلالي
حيث گاع الغوات
وگاع السكات
من خيالك ديالي
خيالي
.خيالي
شاعر زجل من المغرب